أنا ايه اللى جابنى هنا النهردة وهناك ؟؟

هو أنا غسلت سنانى بسيجنال تو النهردة ؟؟

يمكن مسألتش نفسى النهردة ويمكن سألت
يمكن نسيت ويمكن كسلت

هو المدونة دى أنا عملتها ليه ؟؟



سؤال يمكن جاوبت عليه كتير بس ساعات بفقد الدافع ليه


أنا أحيانا بنسى أنا عملتها ليه

هو مش غلط اننا ننسى

بس الغلط اننا نفضل ناسيين

او منحاولش نفتكر


أنا لسه بكسل أكتب فى الموضوعات اللى عاوزة أناقشها بشكل مختلف

ولسه بلاقى نفسى مش قادرة أعبر

فى حاجات كتير بتستفزنى ومش باخد رد فعل مناسب ليها

أنا مش لوحدى كده

كتير مننا كده فى حاجات كتير بيفكر فيها
وممكن ياخد خطوة عشان يحققها
و بيتكاسل وبيتراجع عنها

لسه عنده فوبيا من المجهول ولو بنسبة بسيطة

لسه بيقول مش وقته بعدين وبيسوف

لسه كل حاجة عاوز يعملها بتخوف

أحيانا الموضوع محتاج ذرة اصرار زيادة
ليه دايما الذرة دى مفقودة ومش قادرين نوصلها

يمكن سؤال اتسألته من شوية فتح الكلام ده كله وخلانى افكر فيه

أنا ايه مواصفات فتى أحلامى

تخيلوا معرفش

أنا مش راسمة صورة فى خيالى لحياتى الجاية

مفيش هدف واضح ...مذبذبة فى حاجات كتير

أغلبنا كمان فى فترة التخرج كده

فى زمايل لينا خلاص خلصوا وأخدوا لقب عاطل بجدارة

سألت واحد منهم ناوى على ايه قالى مش عارف

سألنى أنا كمان قلتله مش عارفة بس عاوزة اشتغل

ليه دايما احلامنا مش واضحة

hazy

هل إحنا بنعمل كل حاجة واحنا عارفين هدفنا من وراها ايه
وعاوزين ايه منها ؟؟


كل واحد فينا جواه بطل كبير
جواه حاجات حلوة وطاقات كتير

يمكن مش عارفها


بعد أكتر من عقدين من الزمن
واسمحولى اقول عقدين كده فى نص الكلام
:D

لسه بكتشف فى نفسى حاجات مشوفتهاش
قبل كده وعمرى ما فكرت إنها تكون أصلا فيا

أكيد فى ناس زيى

أنا لما بجاوب على اسئلة زى الكويزات على الفيس
بعرف عن نفسى كتير ويمكن بتعرض لأسئلة مفكرتش فيها
ولا عمرى جاوبتها

عايشين مسلمين لواقع معين ومبنحاولش نفسره أو نخترق أعماقه أكتر

فى ناس حوالينا كتير بيشوفوا فينا مميزات وأحنا نقول لا إحنا مش كده

لسه فى ثقة مهزوزة فينا ولسه الخمول مغطينا

أنا إعمالا لمبدأ الجروب بتاعى على الفيس

Crazy upside Down

هقولكم الخلاصة


بالظبط لو انت حاطط هدف انك تخلى سنانك بيضا ومش مسوسة
وانت بتغسل وشك ذرة الاصرار الزيادة هتيجى من الدافع وهتغسل سنانك

وبالمثل كل حاجة بنعملها فى حياتنا

لو عرفنا هدف المنهج اللى بندرسه هنذاكره
لو عرفنا احنا ليه دخلنا الكلية دى هننجح فيه
لو عرفنا ليه احنا بنكلم فلان او بنعمل الحاجة الفلانية
هنحقق المطلوب منها

يمكن إحنا بنقضى الوقت عالفيس هنا عشان نتسلى وخلاص
لأغلب الناس بس لو بصينا لكل حاجة بنظرة تانية هنستفيد من كل حاجة حوالينا

خلى من ورا كل حاجة هدف واسعى انك تحققه
هيتحقق بان الله

أنا عندى كلام كتير
بقول كفاية لحد كده النهردة ونكمل بعدين

أتمنى أكون لفت نظرى قبل نظركم لحاجة جديد
ع الهـــــــامش من حياتنا بس بتأثر

Omneya..